ഗ്വാളിയോര്: നമീബിയയ്ക്ക് നന്ദി, ഞങ്ങള്ക്ക് പുതിയ അതിഥികളെ തന്നതില്. ഇത് ചരിത്രനിമിഷമാണ്. ഏഴരപ്പതിറ്റാണ്ട് മുമ്പ് വംശാവലയൊന്നാകെ അസ്തമിച്ചുപോയ ഒരു ജീവിവര്ഗത്തിന്റെ തിരിച്ചു വരവ്. ഈ അമൃതകാല സൗഭാഗ്യത്തിലേക്ക് നടക്കാന് സഹായിച്ചതിന് നമീബിയ സര്ക്കാരിന് രാജ്യത്തിന്റെ നന്ദി അറിയിക്കുന്നു, പ്രധാനമന്ത്രി നരേന്ദ്രമോദി പറഞ്ഞു. മധ്യപ്രദേശിലെ കുനോ ദേശീയപാര്ക്കിലേക്ക് നമീബിയയില് നിന്നെത്തിച്ച എട്ട് ചീറ്റകളെ തുറന്നുവിട്ട് സംസാരിക്കുകയായിരുന്നു അദ്ദേഹം.
നൂറ്റാണ്ടുകള് പഴക്കമുള്ള ജൈവവൈവിധ്യത്തിന്റെ കണ്ണി അറ്റുപോയിട്ട് ഏഴരപ്പതിറ്റാണ്ടാവുന്നു. 1952ല് അന്ന് രാജ്യത്തെ നയിച്ചവര് ആ അധ്യായം വംശനാശമെന്ന് പറഞ്ഞ് അടച്ചുകളഞ്ഞതാണ്. കണ്ണി മുറിക്കാനാകാത്ത ജൈവബന്ധവും ഭാരതത്തിന്റെ പവിത്രമായ പരിസ്ഥിതിബോധവും കൈകോര്ത്തപ്പോഴാണിത് സംഭവിച്ചത്. അമൃതോത്സവ കാലത്ത് ഇത് പുത്തന് ഊര്ജ്ജമാണ് പ്രദാനം ചെയ്യുന്നത്.
പ്രകൃതിയും പരിസ്ഥിതിയും മൃഗങ്ങളും പക്ഷികളും ഇന്ത്യയെ സംബന്ധിച്ച് സംവേദനക്ഷമതയുടെയും ആത്മീയതയുടെയും ആധാരമ കൂടിയാണ്. സമ്പദ്വ്യവസ്ഥയും പരിസ്ഥിതിശാസ്ത്രവും പരസ്പരവിരുദ്ധമല്ല എന്ന ആത്മീയസന്ദേശമാണ് പുതിയ ഇന്ത്യ ലോകത്തിന് പകരുന്നത്, പ്രധാനമന്ത്രി പറഞ്ഞു.
പ്രത്യേകം തയ്യാറാക്കിയ ജംബോജെറ്റിലാണ് ചീറ്റകളെ നമീബിയയില് നിന്ന് ഇന്നലെ ഗ്വാളിയോറിലെത്തിച്ചത്. അഞ്ച് പെണ്ണും മൂന്ന് ആണുമടക്കം എട്ട് ചീറ്റകളാണ് ഇന്ത്യക്ക് സ്വന്തമായത്. ഗ്വാളിയോറില് നിന്ന് ഹെലികോപ്റ്ററുകളിലാണ് ഇവയെ കുനോ പാര്ക്കിലെത്തിച്ചത്.
Discussion about this post