ന്യൂദല്ഹി: 15 വര്ഷത്തില് അധികം പഴക്കമുള്ള സര്ക്കാര് വാഹനങ്ങള് ഏപ്രില് മുതല് പൊളിച്ചുതുടങ്ങുമെന്ന് പ്രഖ്യാപിച്ച് കേന്ദ്രമന്ത്രി നിതിന് ഗാഡ്കരി. കേന്ദ്ര സംസ്ഥാന സര്ക്കാരുകളുടെ ഉടമസ്ഥതയിലുള്ള വാഹനങ്ങള് ഇതിന്റെ ഭാഗമായി പൊളിയ്ക്കും.
ഏകദേശം സര്ക്കാര് ഉടമസ്ഥതയില് ഇത്തരം ഒന്പതു ലക്ഷത്തില് പരം വാഹനങ്ങള് ഉണ്ട്. ഇവ ഏപ്രില് ഒന്നുമുതല് പൊളിച്ചു തുടങ്ങുമെന്ന് നിതിന് ഗാഡ്കരി വ്യക്തമാക്കി. ഇവയ്ക്കു പകരം സര്ക്കാരുകള്ക്ക് പുതിയ വാഹനങ്ങള് അനുവദിക്കും.
മലിനീകരണം കുറയ്ക്കുകയാണ് ലക്ഷ്യം. സംസ്ഥാന ട്രാന്സ്പോര്ട്ട് കോര്പ്പറേഷനുകളുടെ ഉടമസ്ഥതയില് ഉള്ള പഴയ ബസ്സുകളും പൊതുമേഖലാ സ്ഥാപനങ്ങളുടെ വാഹനങ്ങളും പൊളിയ്ക്കും.
നയം അനുസരിച്ച് വ്യക്തികളുടെ ഉടമസ്ഥതയിലുള്ള വാഹനങ്ങള്ക്ക് 15 വര്ഷത്തിനു ശേഷവും വാണിജ്യ വാഹനങ്ങള്ക്ക് 20 വര്ഷത്തിനു ശേഷവും ഫിറ്റ്നെസ് ടെസ്റ്റ് നടത്തണം. ഫിറ്റ്നസ് ടെസ്റ്റില് പാസാവുന്നവയ്ക്കു രജിസ്ട്രേഷന് പുതുക്കി നല്കും. അല്ലാത്തവ പൊളിക്കണം. ഇത്തരത്തില് പൊളിച്ചു പുതിയ വാഹനം വാങ്ങുമ്പോള് റോഡ് നികുതിയില് 25 ശതമാനം സര്ക്കാര് ഇളവു നല്കും.
15 വര്ഷം പഴക്കമുള്ള ഇരുചക്രവാഹനത്തിന്റെ രജിസ്ട്രേഷന് പുതുക്കാന് 300 രൂപ ഈടാക്കിയിരുന്നത് 1000 രൂപയാക്കി. കാറിന്റേത് 600-ല്നിന്ന് 5000 ആയി ഉയരും. ഇറക്കുമതി ചെയ്ത ബൈക്കുകള്ക്ക് 10,000 രൂപയും കാറുകള്ക്ക് 40,000 രൂപയും നല്കണം. രജിസ്ട്രേഷന് പുതുക്കിയില്ലെങ്കില് ഇരുചക്രവാഹനങ്ങള്ക്ക് മാസംതോറും 300 രൂപയും മറ്റു വാഹനങ്ങള്ക്ക് 500 രൂപയും പിഴനല്കണം.
Discussion about this post