കണ്ണൂർ: എബിവിപി പ്രവർത്തകയെ എസ്എഫ്ഐ പ്രവർത്തകർ ഇരുട്ട് മുറിയിൽ പൂട്ടിയിട്ട സംഭവത്തിൽ കണ്ണൂർ ഗവൺമെന്റ് പോളിടെക്നിക് കോളേജിലേക്ക് മാർച്ച് നടത്തി എബിവിപി. വിദ്യാർത്ഥിനി പരാതി നൽകിയിട്ടും കുറ്റക്കാർക്കെതിരെ നടപടി ഇല്ലാത്തതിനെ തുടർന്നാണ് എബിവിപി പ്രവർത്തകർ കോളേജിലേക്ക് മാർച്ച് നടത്തിയത്. റോഡിൽ കുത്തിയിരുന്ന് പ്രതിഷേധിച്ച എബിവിപി പ്രവർത്തകരെ പോലീസ് അറസ്റ്റ് ചെയ്തു നീക്കി.
കുറ്റക്കാർക്കെതിരെ ശക്തമായ നടപടിയെടുക്കും വരെ സമരങ്ങളുമായി മുന്നോട്ടുപോകാൻ തന്നെയാണ് തീരുമാനമെന്ന് എബിവിപി വ്യക്തമാക്കി. 74 പേരാണ് ക്യാമ്പസിൽ മെമ്പർഷിപ്പ് എടുത്തിട്ടുള്ളത്. രണ്ടു വർഷത്തിനുള്ളിൽ എബിവിപിയുടെ പതാക കണ്ണൂർ ഗവൺമെൻറ് പോളിടെക്നിക് കോളേജിൽ പാറിക്കുമെന്നും മാർച്ച് ഉദ്ഘാടനം ചെയ്ത് എബിവിപി സംസ്ഥാന ജോയിന്റ് സെക്രട്ടറി അഭിനവ് തൂണേരി പറഞ്ഞു.
അതേസമയം എബിവിപിയുടെ കനത്ത പ്രതിഷേധത്തിനൊടുവിൽ സംഭവത്തിൽ പോലീസ് കേസെടുത്തു. മൂന്ന് വനിത പ്രവർത്തകർ അടക്കം ഏഴ് എസ്എഫ്ഐ പ്രവർത്തകർക്കെതിരെയാണ് എടക്കാട് പോലീസ് കേസെടുത്തിട്ടുള്ളത്. കഴിഞ്ഞ ദിവസമാണ് കണ്ണൂർ ഗവൺമെന്റ് പോളിടെക്നിക് കോളേജിൽ എബിവിപി മെമ്പർഷിപ്പ് വിതരണം ചെയ്തതുമായി ബന്ധപ്പെട്ട് വിദ്യാർത്ഥിനിയായ ആരാധനയെ എസ്എഫ്ഐ പ്രവർത്തകർ ഇരുട്ട് മുറിയിൽ പൂട്ടിയിട്ടത്. സംഭവത്തിൽ ആരാധന കോളേജ് പ്രിൻസിപ്പലിന് പരാതി നൽകിയിരുന്നു. ഇതിൽ നടപടി ഇല്ലാത്തതിനെ തുടർന്നാണ് എസ്പിയ്ക്കും പരാതി നൽകിയത്.
പലപ്പോഴും പുറത്ത് നിന്നുള്ള എസ്എഫ്ഐ പ്രവർത്തകർ തന്നെ റാഗ് ചെയ്തിരുന്നതായും ഇങ്ങനെ ഒരു സംഭവം നടന്നിട്ടും ആരും പ്രതികരിക്കുന്നില്ലെന്നും വിദ്യാർത്ഥിനി പരാതിയിൽ പറയുന്നു. രാഖി കെട്ടിയതിനും എസ്എഫ്ഐ പ്രവർത്തകർ ചോദ്യം ചെയ്തിരുന്നു. ബാത്റൂമിൽ പോകാൻ പോലും തന്നെ അനുവദിച്ചില്ലെന്നും ആരാധന പറഞ്ഞു. കുറ്റം ചെയ്തവർക്കെതിരെ കർശനമായ നടപടി സ്വീകരിക്കും വരെ നിയമപരമായി പോരാടാനാണ് തന്റെ തീരുമാനമെന്നും ആരാധന അറിയിച്ചു.
Discussion about this post